Անշարժ գույքում հաջողված ներդրման օրինակ։ RIS Opera Apartments Yerevan

RIS Opera Apartments Yerevan-ը հանդիսանում է RIS Apartments-ի մասը, որը միավորում է տարբեր տեսակի բնակարանների հավաքածուներ՝ ցանկացած հյուրի կարիքներին համապատասխան։ RIS ապրանքանիշի տակ գործող բնակարաններին կապում է մեկ ընդհանուր գաղափար․ յուրաքանչյուր հյուր պետք է զգա միջավայրի հյուրընկալությունը և ստանա ամենաբարձրակարգ սպասարկումը։

RIS Apartments ապրանքանիշը ստեղծվել և կառավարվում է FYM Hospitality Group–ի կողմից։

RIS Opera Apartments Yerevan–ն իրենից ներկայացնում է ափարթհոթել Երևանում, այսինքն մեկ շենքում գտնվող և կարճաժամկետ վարձակալության համար նախատեսված բնակարանների հավաքածու, որոնցում գործում է հյուրանոցային սպասարկում։ Այն գտնվում է Երևան քաղաքի կենտրոնում՝ Տերյան 52 հասցեում, որտեղ 6–հարկանի շենքի վերին 3 հարկերում տեղակայված 8 առանձին բնակարան գործում են մեկ բրենդի ներքո։

Վերջին տարիներին ամբողջ աշխարհում ափարթհոթելի հայեցակարգն ավելի ու ավելի է տարածվում։ Սա հնարավորություն է տալիս ներգրավել այն հյուրերին, ովքեր փնտրում են բնակարանների հարմարավետությունը, սակայն ցանկանում են նաև հյուրանոցային բարձրակարգ սպասարկում՝ մաքրությունից սկսած մինչև անվտանգություն։

RIS Apartments բրենդի ներքո FYM Hospitality Group-ը զարգացնում է ափարթհոթելների ցանց։ Այսպիսի ափարթհոթել կարող են դառնալ քաղաքի կենտրոնում մեկ շենքում գտնվող 4 և ավել բնակարանները։ RIS Opera Apartments Yerevan–ի դեպքում բնակարանների քանակն 8 էր, իսկ տեղադիրքը՝ Ալեքսանդր Սպենդիարյանի անվան օպերայի և բալետի ազգային ակադեմիական թատրոնին կից, այստեղից էլ՝ անվանումը։

– Սեփականատերերի նպատակները

Ի սկզբանե գույքի սեփականատերերի համար նախագծի հիմնական նպատակն էր այն վերանորոգելը և որպես հյուրանոց շահագործելը։ Ստանդարտ կերպով վարձակալության հանձնելը պլանների մեջ չի եղել, դիտարկվել է հենց ափարթհոթելի հայեցակարգը։ FYM Hospitality Group-ի և Mixxup-ի համատեղ աշխատանքների արդյունքում հնարավոր է եղել տվյալ գույքը վերածել այնպիսի միջավայրի, որտեղ հյուրերին տրվում է Երևանի կենտրոնում տեղացիների կյանքով ապրելու փորձառություն՝ գեղեցիկ և պրոֆեսիոնալ կազմակերպված տարածքներում։

– Կատարված ուսումնասիրությունները

Նախագծի իրագործելիության գնահատականը հիմնվել է նմանատիպ գույքերից մեր ունեցած տվյալների վրա, որը կուտակվել է 8 տարվա փորձի արդյունքում։ Իրականացվել է նաև շուկայի վիճակի, տարածքի և պահանջարկի ուսումնասիրություն, որի արդյունքում բացահայտել ենք, որ նման հայեցակարգը կունենա բարձր պահանջարկ այդ վայրում։ Հայեցակարգի պահանջարկը վերջին տարիներին աճում է ամբողջ աշխարհում, քանի որ մարդիկ փնտրում են առանձնացված կացության տարբերակներ՝ բարձրակարգ հյուրանոցային սպասարկմամբ։

– Առաջացած խնդիրները և դրանց հաղթահարումը

Նախագծի առաջին կարևոր աշխատանքներից մեկն է եղել սենյակների ճիշտ բաժանումը և հիմնովին վերանորոգումը ժամանակակից մինիմալիստական դիզայներական լուծումներով, ինչի արդյունքում մենք կարողացել ենք ունեցած մակերեսն օգտագործել առավելագույն օգտակարությամբ։ Սա և FYM Hospitality Group-ի՝ օպերացիոն կառավարման համակարգի ներդրումն օգնել են ապահովել բարձր զբաղվածություն, ինչի արդյունքում բարձր է եղել նաև գույքից ստացվող եկամտաբերությունը, ինչպես նաև բարձրացել է գույքի արժեքը։

Նախագծի մեկնարկի ժամանակ Հայաստանում անշարժ գույքի և հյուրընկալության ոլորտը կտրուկ աճ էր ապրում՝ պայմանավորված ռուս-ուկրաինական հակամարտության արդյունքում զբոսաշրջիկների ներհոսքով Հայաստան։ Այս ներհոսքը, իհարկե, իր դրական ազդեցությունն ունեցել է նախագծի հաջողության գործում, սակայն նախագծի իրագործելիության հաշվարկներն արվել էին այդպիսի արտաքին գործոնների ազդեցությունը դուրս թողնելով, ինչի արդյունքում հիմա էլ նախագիծը շարունակում է գրանցել գերազանց արդյունքներ։

Ամբողջ 2024 թվականին ափարթհոթելն ունեցել է միջինում 84.01% զբաղվածություն, ընդունել է 1315 հյուր, իսկ ամրագրման հարթակներում միջին գնահատականը կազմում է 9.8/10։

Mixxup-ի ու FYM-ի թիմերը գույքի սեփականատերերի հետ միասին առանց ջանք խնայելու աշխատել և աշխատում են նախագծի արդյունավետության ապահովման համար՝ պահպանելով թափանցիկություն։ Արդյունավետության գնահատման համար սահմանվել էին մի շարք չափանիշներ (KPI-ներ, եկամտաբերություն և այլն) և քննարկվել են տարբեր սցենարներ՝ վատատեսական, իրատեսական և լավատեսական դեպքերի համար։ Արդյունքը եղել է կանխատեսված իրատեսական սցենարից փոքր ինչ ավելի բարձր։

Նախագծի մշակման փուլում մտահոգություններից մեկն էր շենքում վերելակի բացակայությունը, սակայն պրոֆեսիոնալ սպասարկման միջոցով հնարավոր է եղել ոչ միայն մեղմել այդ գործոնը, այլև չեզոքացնել, որպեսզի այն ոչ մի կերպ չազդի ո՛չ զբաղվածության, ո՛չ գնագոյացման վրա։

Նախագծի իրականացման և գործարկման արդյունքում մենք համոզվեցինք, որ այս հայեցակարգը ծախսարդյունավետ բիզնես մոդել է և դրանով կարելի է ստանալ անշարժ գույքի վարձակալության բարձր եկամտաբերություն Հայաստանում։ Այս նախագծի հաջողությունն ուղղորդեց մեզ աշխատանքներ իրականացնել դրա տարածման ուղղությամբ։ Նմանատիպ ևս մեկ նախագիծ այս պահին գտնվում է մշակման փուլում՝ Մաշտոցի պողոտա։